MARAYKANKA OO RUNTA U SHEEGAY SOOMALILAND.
(SAWIRKA)-CIRRO IYO TRUMP.
(USA)-Sida ey werisay Majaladda Fox News, afhayeen u hadlay Waaxda Arrimaha Dibadda Maraykanka ayaa sheegtay in aaney hadda jirin wadahadallo u dhexeeya Maraykanka iyo Somaliland oo ku saabsan Aqoonsiga. Warbixin ey baahisay Fox News, oo lagu falanqeeyay suurtagalnimada iyo faa’iidada uu Maraykanku ka heli karo Aqoonsiga Somaliland, ayaa lagu sheegay in afhayeenka oo wax laga waydiiyay arrinta Aqoonsiga ey caddeeysay in Washington ey weli aaminsan tahay Madax-bannaanida Soomaaliya. “Maraykanku waxa uu aqoonsan yahay Madax-bannaanida Jamhuuriyadda Federaalka Soomaaliya, iyo Madaxbannaanida dhuleedkeed oo ey Somaliland ku jirto,” ayey tiri afhayeenta. “Waaxda Arrimaha Dibadda hadda wadahadallo toos ah kulama jirto wakiillo ka socda Somaliland.” Dhanka kale, Fox News waxa ey sheegtay in Somaliland ey iyaduna ku doodayso in hawsha Aqoonsigu meel fiican marayso, isla markaana la filayo in Madaxweynaha Somaliland, Cabdiraxmaan Maxamed Cabdillaahi Cirro, uu dhawaan booqdo magaalada Washington. Madaxweyne Cirro, oo dhawaan hadal ka jeediyay magaalada Berbera, ayaa sheegay in Aqoonsiga Somaliland uu iman doono inta uu xilka hayo. Somaliland ayaa Maraykanka u soo bandhigtay Saldhig Ciidan oo uu ka sameysto magaalada istiraatiijiga ah ee Berbera, iyo Macdano Naadir ah, si ey Soomaaliland u hesho Aqoonsi rasmi ah oo ka yimaadda Washington. Sen. Ted Cruz, oo ah Guddoomiyaha Guddiga Hoosaadka Arrimaha Afrika ee Aqalka Senet-ka Maraykanka, iyo siyaasiyiin kale oo riixaya arrinta Aqoonsiga Somaliland, ayaa sheegay in Somaliland tahay xulufo wax ku ool ah oo Maraykanka ka caawin karta sidii loo yarayn lahaa saamaynta sii kordhaysa ee Shiinaha ee Gobolka. Dowladda Soomaaliya ayaa dhankeeda si adag uga soo horjeeda dhaqdhaqaaqyada Aqoonsi-raadinta Somaliland, iyada oo sheegtay in Aqoonsiga Somaliland uu sababi karo in Argagixisadu u hesho marmarsiiyo dagaalkeeda, isla markaana uu dhaawacmi karo iskaashiga ka dhexeeya Washington iyo Muqdisho.
XIGASHO-HOL.
