DANJIRE DIDEFO OO LOO SOO JAWAABAY LOONA SHEEGAY IN…

(SAWIRKA)-XIL.MUSTAFA BAKRI.

(EGYPT)-Xildhibaan Mustafa Bakri oo ka tirsan Baarlamaanka dalka Masar ayaa sheegay in ka qeybgalka Ciidamada Masar ee Howlgalka Nabad-ilaalinta Soomaaliya uu yahay arrin caadi ah oo uu go’aamiyo Midowga Afrika, balse aanay Itoobiya waxba kaga hadli karin. Mustafa Bakri wuxuu carabka ku adkeeyay in Masar ka qaybgalkeeda Howlgalka Nabad ilaalinta Soomaaliya aanu xiriir la lahayn khilaafka Biyo-xireenka kala dhaxeeya dalka Itoobiya. Bakri ayaa intaas ku daray in Ciidamada Masar ee Soomaaliya imaan doona ey gargaar ku yihiin Dowladda Soomaaliya si ey ula dagaallanto kooxaha Argagixisada eyna taageeraan xasilloonida. Sida uu sheegay, joogitaankaasi wuxuu ku imaan doonaa casuumaad ka timaadda Muqdisho iyo oggolaanshaha Midowga Afrika, taasoo siinaysa sharciyad buuxda. Waxa uu dhaliisha Itoobiya ku tilmaamay mid aan la aqbali karin oo lagu doonayo in xiisadda la kiciyo. Wuxuu xusay in joogitaanka Masar uu ku dhisan yahay heshiisyo sharci ah oo ey Qaahira iyo Muqdisho kala saxiixdeen, isla markaana qayb ka ah Qaab-dhismeedka Midowga Afrika. Bakri waxa uu sheegay in Itoobiya eysan dooneynin in Masar door muuqda ka qaadato gobolka, isagoo xusay in suuragal tahay in Ciidamada Itoobiya iyo kuwa Masar isku dhacaan haddii xaaladdu kacsanaato. Danjiraha Itoobiya u fadhiya Soomaaliya, Suleyman Didefo, ayaa wareysi uu siiyay telefishinka Soomaaliga ah ee Universal ku sheegay in dalkiisu ka xun yahay qorshaha lagu keenayo Ciidamo Masri ah gudaha Soomaaliya.

XIGASHO-HOL.