HAYADAH AMNIGA CAASIMADDA OO HAWLGAL KA WADA DEG.C/CASIIS.
(SAWIRKA)-TALIYAHA QEYBTA BOOLISKA G/BANDIR.
(MUQDISHO/SOMALIA)-Wararka ka imanaayo dgemadda C/casiis ee Gobolka Banaadir ayaa sheegaayo in Ciidamada ammaanka ee dowladda Soomaaliya ayaa bilaabay howlgal lagu ururinayo hub sharci-darro ah oo la sheegay in ay lahaayeen kooxo maleeshiyaad ah oo ay sheegeen in ay dhawaan weerarka ka geysteen Degmada Cabdicasiis ee gobolka Banaadir. Sida lagu sheegay war-saxaafadeed ka soo baxay taliska Booliiska gobolka Banaadir, hubkan ayaa lagu qariyey goobo kala duwan oo ku yaalla degmada, waxaana ciidamada ammaanku wadaan baaritaanno iyo howlgallo lagu soo saarayo hubkaasi si loo adkeeyo amniga magaalada Muqdisho. Hay’adaha ammaanka ayaa ugu baaqay shacabka ku nool Degmada Cabdicasiis iyo deegaanada ku dhow inay si dhow ula shaqeeyaan ciidamada fulinaya howlgalka, iyagoo xusay in wada-shaqeynta bulshada ay muhiim u tahay xaqiijinta nabadda iyo xasilloonida. War-saxaafadeedka ayaa sidoo kale lagu caddeeyay in aan la aqbali doonin in guryaha lagu kaydiyo ama lagu qariyo hub sharci-darro ah oo khatar ku ah amniga caasimadda iyo kan guud ahaan dalka. Mas’uuliyiinta ammaanka ayaa sheegay inay tallaabooyin adag oo waafaqsan sharciga ka qaadi doonaan cid kasta oo lagu helo inay ku lug leedahay kaydinta, qarinta ama fududeynta dhaqdhaqaaqa hubka sharci-darrada ah. Dhinaca kale, Madasha Samatabixinta Soomaaliyeed ayaa ka digtay waxa ay ku tilmaantay qorshayaal amni oo laga yaabo inay sii kordhiyaan xiisadda siyaasadeed iyo tan amni ee ka taagan caasimadda Soomaaliya, iyadoo sheegtay in ciidamo gaar ah oo ka tirsan dowladda ay damacsan yihiin inay beegsadaan hoyga Taliyihii hore ee Ciidanka Xoogga Dalka Soomaaliyeed, Janaraal Odowaa Yuusuf Raage. War-saxaafadeed ay Madashu soo saartay ayay ku sheegtay in ciidamo uu hoggaaminayo Aadan Maxamed Cumar (Aadan Dheere), oo ay taageerayaan xubno ka tirsan hay'adaha amniga, ay wadaan qorshe lagu weerarayo hoyga Janaraal Odowaa ee degmada Cabdicasiis. Sidoo kale, Madashu waxay ku eedeysay madaxweyne Xasan Sheekh Maxamuud inuu qorsheynayo beegsiga hanti ganacsi iyo hoteello gaar loo leeyahay, eedeymo aan jirin xaqiijin madax-bannaan oo laga helay dhinacyada ay khuseyso. Madashu waxay sidoo kale cambaareysay dhacdo ay sheegtay in ciidamo hubeysan ay ku galeen hoyga Sheekh Cabdulqaadir Soomow, iyadoo ku tilmaantay tallaabo sii hurin karta xiisadaha siyaasadeed iyo amni ee Muqdisho. War-saxaafadeedka ayaa lagu sheegay in dhinaca ay Madashu ku tilmaantay “talis muddo-xileedkiisu dhammaaday” uu ka baxay heshiisyo hore loogu gaaray dejinta xaaladda iyo xabbad-joojinta, isla markaana uu qaaday tallaabooyin kordhinaya kala shaki iyo iska horimaad siyaasadeed. Madasha Samatabixinta Soomaaliyeed ayaa ugu dambeyn ugu baaqday ciidamada qalabka sida inay ilaaliyaan waajibaadkooda dastuuriga ah, kana fogaadaan in loo adeegsado dano siyaasadeed, iyadoo ka digtay in xaaladdu u horseedi karto dalka marxalad cusub oo xasillooni darro ah haddii aan la xakameyn.
ISHA-HOL.
