NIN SURIYAAN AH OO 13-SANO KU DHUUMANAAYEY GIDAARKA GURIGA AWOOWGIIS.

(MUUQAALKA)-ZAKOOR.

(DAMASCUS/SYRIA)-WAA QISO DHAB AH OO DHACDAY: Sheekada Maxamed Zakoor oo u dhashay Suuriya ayaa dad badan la yaab ku noqotay, waxaana loo arkaa mid ka mid ah kiisaska ugu yaabka badan ee dadka la waayay. Wuxuu in ka badan 13 sano ku qaatay meel aan ka weyneyn hal mitir oo ballac ah, gadaasha derbi ku yaal guriga awoowgiis ee magaalada AL-Laadiqiyah. Ma ahayn xabsi rasmi ah, laakiin wuxuu noqday xabsi uu isagu isku soo dhiibay, halkaas oo uu ku dhuumanayay cabsi uu ka qabay in la xiro xilligii uu xukunka hayay Madaxweynihii la afgambiyay ee Suuriya Bashar AL-Assad. Dhanka kale, carruurtiisu waxay noolaayeen sannado badan iyagoo aaminsan in aabahood dhintay. Sida laga soo xigtay warbixinta Zakoor, sida uu ku warramay wargeyska An-Nahaar wareysi uu dhawaan bixiyay, sheekadu waxay bilaabatay ka dib markii ciidamada amniga ay laba jeer xireen intii lagu jiray sannadihii hore ee kacaankii Suuriya. Ka dib markii la sii daayay, wuxuu sheegay inuu helay digniin ka timid dad qaraabo ah oo sheegeyso in Hay'adaha Amniga ay mar kale raadinayaan, sidaas darteedna uu go'aansaday inuu dhuunto halkii uu halis u geli lahaa xarig saddexaad. Zakoor ma uusan dooran meel ka fog qoyskiisa. Guriga awoowgiis gudahiisa, wuxuu iibsaday agabka dhismaha isagoo kaashanaya xaaskiisa, wuxuuna dhisay derbi qariyay meel aad u yar. Laga bilaabo waqtigaas, guriga laftiisa ayaa noqday meeshii uu ku dhuuman jiray, halka xaaskiisa ay ahayd qofka kaliya ee ogaa inuu weli nool yahay. Noloshii derbiga ka dambaysay aad bay u adkeyd. Warbixinnadu waxay tilmaamayaan in xaaskiisa ay u dhiibtay cunto, biyo, dhar, iyo daawo iyada oo mareysa meel yar. Marka uu xanuunsado, wuxuu u sheegi jiray astaamihiisa, waxayna u geyn jirtay dhakhtarka, u sheegi jirtay xaaladdiisa, ka dibna waxay la soo noqon jirtay daawada. Sannadahaas oo dhan, ma uusan awoodin inuu baxo oo uu si caadi ah u arko qoyskiisa. Laakiin qaybta ugu yaabka badan ee sheekadu waxay khuseysaa carruurtiisa. Xaaskiisa ayaa qarin jirtay xaqiiqda ah in aabahood uu ku jiray derbiga gadaashiisa, iyadoo ka baqaysa in midkood uu si aan ula kac ahayn u shaaciyo. Sannadihii la soo dhaafay, carruurtu waxay ku koreen iyagoo aaminsan in aabahood dhintay. Sida laga soo xigtay warbixinnada, walaalka Zakoor, oo ku nool Turkiga, ayaa u sameeyay xus/Tacsi isagoo weli nool, mitir u jira qoyskiisa. Ilo wareedyo ayaa sheegaya in Zakoor uu maqli karay carruurtiisa oo ka soo koraya derbiga gadaashiisa, iyagoo aan hortooda imaan karin. Wuxuu ka sheekeeyay in wiilkiisa curadka ah uu ka tagay isagoo yar, oo uu soo baxay isagoo dhalinyaro ah ka dib markii uu ka tagay meeshii uu ku dhuumanayay. Sannadahani ma ahayn oo keliya maqnaansho adduunka, laakiin waxay ahaayeen maqnaansho nolosha carruurtiisa laftooda, inkastoo uu jir ahaan ku sugnaa isla guriga. Daqiiqaddii ugu dambeysay lana gaaray Diseembar 8, 2024. Waaberigii, Zakoor wuxuu maqlay dhawaqa takbir/allaahu akbar ee dibadda wuxuuna xaaskiisa weydiiyay waxa dhacaya. Markii uu ogaaday in xukunka Bashar AL-Assad uu dhacay, wuxuu ogaaday in sababtii ku kalliftay inuu dhuunto sannadahaas oo dhan ay soo afjarantay, sidaas darteed wuxuu ka soo baxay dhuumashada in ka badan 13 sano ka dib. Laakiin soo ifbixitaankiisa ayaa keenay argagax kale. Sida laga soo xigtay wargeyska AL-Nahaar, xaaskiisa ayaa carruurtiisa ka codsatay inay qaboojiyaha ka wareejiyaan hortiisa albaabka meesha lagu qarinaayey, ka dibna waxay u sheegtay in aabahood uu ku jiro derbiga gadaashiisa. Markii hore, ma aysan rumaysan karin waxay maqlayeen, ka hor inta uusan aabahood hortooda imaan ka dib sannado badan oo ay u maleynayeen inuu noqday wax la soo dhaafay.

ISHA-AA.