(MUUQAALKA)-WASIIR FIQI IYO SIIHAYAHA SAFARADA USA.
(MUQDISHO/SOMALIA)-Wasiirka Difaaca ee Dowladda Federaalka Soomaaliya, Mudane Axmed Macallin Fiqi, ayaa magaalada magaaladda Muqdisho kula kulmay Siihayaha Arrimaha Dibadda Mareykanka ee Soomaaliya, Marwo Ruth Anne Stevens-Klitz. Kulanka ayaa diiradda lagu saaray xoojinta iskaashiga istaraatiijiyadeed ee ka dhexeeya Soomaaliya iyo Mareykanka ee dhinacyada difaaca iyo amniga, iyo sidoo kale howlgallada socda ee ka dhanka ah kooxaha xagjirka ah ee Khawarij ee dalka. Labada dhinac waxay si gaar ah uga wada hadleen waajibaadka iyo mustaqbalka hawlgalka AUSSOM, iyagoo ku nuuxnuuxsaday muhiimadda ay leedahay in la hubiyo in geeddi-socodka kala-guurka amniga si wanaagsan loo qorsheeyay, loo isku dubbariday, isla markaana lagu saleeyay kartida iyo diyaargarowga Ciidamada Qalabka Sida ee Qaranka Soomaaliya. Kulanka ayaa sidoo kale looga hadlay wareejinta saldhiggii hore ee ciidamada AUSSOM ee magaalada Baraawe, kaas oo hadda ay la wareegeen ciidamada qalabka sida ee Soomaaliya. Tallaabadan ayaa qayb ka ah dadaallada ballaaran ee lagu xoojinayo awoodda ciidamada qaranka iyo in si buuxda loo qaado mas'uuliyadda amniga dalka. Dhanka kale, kulanka ayaa Wasiirka Difaaca siiyay dulmar guud oo ku saabsan howlgallada milatari ee socda ee ka dhanka ah kooxda argagixisada ah ee Al-Shabaab iyo kuwa la shaqeeya—kooxaha khatarta ku ah amniga Soomaaliya, xasilloonida gobolka, iyo nabadda adduunka. Wasiirka Gaashaandhigga ayaa hoosta ka xariiqay sida Dowladda Federaalka Soomaaliya ay uga go'an tahay dhismaha ciidan qaran oo xirfad leh oo karti leh, oo si buuxda u qalabaysan si uu u guto waajibaadkiisa dastuuriga ah ee ah ilaalinta madaxbannaanida, midnimada dhuleed, iyo amniga Jamhuuriyadda Federaalka Soomaaliya. Wasiirka ayaa sidoo kale ku nuuxnuuxsaday muhiimadda ay leedahay in la sii xoojiyo iskaashiga ka dhexeeya Soomaaliya iyo Mareykanka, gaar ahaan dhinacyada tababarka, kor u qaadista awoodaha militariga, taageerada hawlgalka, iyo horumarinta awoodda difaaca dalka. Gabagabadii, Wasiirka Gaashaandhigga wuxuu u mahadceliyay dowladda Mareykanka taageerada joogtada ah ee ay siiso Soomaaliya—gaar ahaan howlgallada ay hoggaaminayso Dowladda Federaalka Soomaaliya ee loogu talagalay in lagu ciribtiro argagixisada iyo in la helo nabad iyo amni waara.
ISHA-SNA RADIO.
