SOOMALIYA OO KA HORTAGTAY ASKARAYNTA CARUURTA.

(SAWIRKA)-QRAMADA MIDOOBE.

(NEW YORK)-Qaramada Midoobay ayaa shaaca ka qaaday in ciidamada Booliiska iyo Milatariga ee Dowladda Soomaaliya laga saaray goobaha lagu eedeeyay askaraynta carruurta, taasoo lagu tilmaamay guul weyn oo ka turjumaysa sanado badan oo dadaal ah oo ay dowladda iyo la-hawlgalayaasheedu sameeyeen. Warbixinta Qaramada Midoobay ee la xiriirta carruurta iyo colaadda Soomaaliya, oo loo gudbiyay Golaha Ammaanka, ayaa muujisay heerka xadgudubyada loo geysto carruurta iyo dadaallada lagu hortagayo. Intii u dhaxaysay 2021 ilaa 2024, waxaa la diiwaan geliyay 8,493 xadgudub, kuwaas oo 6,801 ka mid ah ay si toos ah u saameeyeen carruurta. Xadgudubyada ugu badan waxaa ka mid ahaa askaraynta carruurta, afduubka, iyo dilalka carruurta. Al-Shabaab ayaa mas’uul ka ah 66% xadgudubyada la xaqiijiyay, iyadoo weli sii kordhisa qorista carruurta iyo marin-hababka lagu sameeyo masjidyo iyo dugsi Qur’aan oo ku yaalla deegaannada ay maamulaan. Carruurta la qoray waxaa ka mid ahaa kuwo da’doodu tahay 8 sano. Qaramada Midoobay ayaa ku baaqday in si degdeg ah loo joojiyo askaraynta carruurta, lana ilaaliyo iskuullada iyo xarumaha caafimaadka, si loo xoojiyo nidaamyada ka hortagga xadgudubyada. Inkastoo horumar laga gaadhay arrintan, hay’adda ayaa ka digtay in Al-Shabaab weli mas’uul ka yahay inta badan xadgudubyada xuquuqda aadanaha ee dalka, oo ay ku jiraan dilal, afduub, iyo weeraro ka dhan ah shacabka, shaqaalaha gargaarka, iyo hay’adaha dowladda. Tallaabadan ayaa ah mid muhiim u ah ilaalinta carruurta Soomaaliya, iyadoo muujineysa awoodda dowladda iyo taageerada beesha caalamka ee ka hortagga xadgudubyada carruurta ee colaadaha ka dhaca dalka.

XIGASHO-RISAALA.