SHACABKA REER MANDHEERA OO CABASHO KA AH CIIDAMADA JUBALAND EE SOO JABAY.
(SAWIRKA)-GUDOOMIYAHA MANDHEERA MD.MAXAMED KHALIIF.
(MANDHEERA)-Guddoomiyaha Mandera Maxamed Khaliif ayaa walaac ka muujiyay Ciidamada Dawlad Goboleedka Jubbaland ee la sheegay iney ku soo qulqulayaan Mandheera, isagoo ku tilmaamay mid khatar ku ah Amniga iyo Qaranimada dalka Kenya. Isagoo ka hadlayay Jimcaha maanta ah furitaanka Xarun lagu Kilya sifeynta iyo dhagax-dhigga MRI-ga iyo Rugaha caafimaadka ee Isbitalka Waxbarashada iyo gudbinta ee ismaamulka Mandheera, ayaa ka digay in joogitaanka Ciidamada Shisheeye uu wiiqayo Madax-bannaanida Kenya. “Caafimaadka wanaagsan ma kala go’o nabadda iyo amniga, dhawaanahan waxaa xuduudeena ka dhacay dagaal u dhexeeya Ciidamada Xoogga Dalka Soomaaliyeed iyo kuwa DG Jubbaland, kuwaasoo khalkhal galiyay Nolosha iyo Amniga dadkeenna, wax yaabaha khalkhal geliyana waxaa jira in qaar ka mid ah Ciidamada Jubaland oo lagu soo marti-geliyay gudaha dalka Kenya, kuwaasoo dhibaato u geysta Qaranimadeena, khatarna ku ah muwaadiniinteena, Anigoo ah Guddoomiyaha Mandheera, aad ayaan u cambaareynayaa” ayuu yiri Gudoomiyaha Mandheera. "Nabadda iyo Amniga dadkeeyna waa mid aan laga Gorgortami karin, waxaan ugu baaqaynaa dhammaan dhinacyada, Gudaha, Gobolka, iyo kuwa caalamiga ahba, in aan ixtiraamno xuduudaheena oo aan taageerno Nabadda iyo Xasilloonida gobolka," ayuu raaciyay. Guddoomiyuhu waxa kale oo uu u mahad-naqay Hay’adaha Ammaanka ee deegaanka oo uu sheegay iney ka feejigan yihiin, iyo weliba Hay’adaha aan dawliga ahayn ee taageera dadka barakacayaasha ah iyo kuwa Qaxoontiga ah, kuwaasoo in badan oo ka mid ah ey hoy ka dhigteen dugsiyada deegaanka. "Isku-duubnida la soo bandhigay muddadan adag ayaa markhaati u ah adkeysigayaga bulsho ahaan," ayuu raaciyay. Horaantii bishan ayey ahayd markii dadka reer Mandheera ey dhigeen dibad bax ey ku dalbanayeen in Ciidamada Jubaland si deg deg ah looga saaro dhulka Kenya, iyagoo ku sababeeyay falal Amni darro oo sii kordhaya. Hase yeeshee, Madaxweyne ku xigeenka Jubaland, Maxamed Sayid ayaa markii dambe beeniyay sheegashadaas, isagoo ku adkeystay in Ciidamadooda ey ku ekeeyeen xuduudka ey Kenya la wadaagto dalka Soomaaliya. Dadka deegaanka ayaa ku adkeysanaya in askartan ey u gudbeen dhanka Kenya ka dib markii ey ka soo carareen degmada Buulla Xaawo oo dhawaan ey dib u qabsadeen Ciidamada Dowladda Soomaaliya, ka dib dagaal muddo todobaad ah socday oo ey ku barakaceen boqolaal ruux, kuwaasi oo intooda badan gabaad ka dhigtay magaalada Mandheera.
XIGASHO-EV.
