NISA OO SHEEGTAY IN SARKAAL SARE OO ALSHABAAB AH LAGU DILAY SH/HOOSE.

(SAWIRKA)-ASTAANTA NISA.

(SH/HOOSE/KGS)-Muqdisho, Juun 9, 2026 – Hay’adda Sirdoonka iyo Nabad-sugidda Qaranka (NISA) ayaa sheegtay in sarkaal sare oo ka tirsanaa Al-Shabaab lagu dilay hawlgal wadajir ah oo ciidamada ammaanka Soomaaliya iyo saaxiibada caalamiga ah ay ka fuliyeen gobolka Shabeellaha Hoose. War-saxaafadeed ay soo saartay NISA ayaa lagu sheegay in ninkan la dilay uu hore uga badbaaday saddex hawlgal oo kala duwan, balse ugu dambeyn lagu bartilmaameedsaday hawlgalkii ugu dambeeyay. Hay’addu ma shaacin magaca sarkaalka la dilay iyo waddamada ama hay’adaha caalamiga ah ee ka qeyb qaatay hawlgalka. NISA ayaa sheegtay in hawlgalkani uu qeyb ka yahay dadaallada lagu burburinayo hoggaanka iyo shabakadaha Al-Shabaab, si loo yareeyo awoodda kooxda ee qorsheynta iyo fulinta weerarrada ay ka geystaan koonfurta Soomaaliya. Gobolka Shabeellaha Hoose ayaa ka mid ah meelaha ugu muhiimsan ee ay ka socdaan howlgallada ka dhanka ah Al-Shabaab, maadaama uu gobolkaasi ku dhow yahay Muqdisho isla markaana muddo dheer uu ahaa meel ay kooxdaasi ku xoogganeyd. Dowladda Federaalka Soomaaliya ayaa sannadihii u dambeeyay kordhisay howlgallada militari iyo kuwa sirdoon ee lagu bartilmaameedsanayo hoggaanka, dhaqaalaha iyo sahayda Al-Shabaab. Dowladda ayaa sidoo kale ballanqaadday inay sii wadi doonto dagaalka lagula jiro kooxda si loo xoojiyo amniga iyo awoodda dowladda ee dalka. Si kastaba ha ahaatee, ilo madax-bannaan ayaan weli xaqiijin karin faahfaahinta hawlgalkan, maadaama ay adag tahay helitaanka xog sugan oo laga helo goobaha colaadaha ka socdaan.

ISHA-GJ.