MADAXWEYNE XASAN SHEEKH OO KA QEYBGELAAYO SHIRKA AL-CALAMEYN.
(MUUQAALKA)-MADAX.
(CAIRO/EGYPT)-Madaxweynaha Soomaaliya Xasan Sheekh Maxamuud ayaa maanta magaalada New Alamein ee dalka Masar kaga qaybgalaya shir-madaxeed wadatashi ah oo ay isugu imanayaan hoggaamiyeyaasha Masar, Soomaaliya, Eritrea iyo Suudaan. Shirka ayaa waxaa ka qaybgalaya Madaxweynaha Masar Cabdifataax Al-Sisi, Madaxweynaha Eritrea Isaias Afwerki, Madaxweynaha Soomaaliya Xasan Sheekh Maxamuud iyo Guddoomiyaha Golaha Madaxbannaanida Sudan, Cabdifataax Al-Burhan. Sida ay sheegtay Madaxtooyada Masar, kulanka ayaa diiradda lagu saarayaa wadatashi iyo isku-dubbaridka mowqifyada ku saabsan arrimaha gobolka ee ay dalalku danaha wadaagaan. Kulanka ayaa ku soo beegmaya xilli ay sii kordhayaan xiisadaha siyaasadeed iyo kuwa amni ee Geeska Afrika. Xiriirka Itoobiya iyo Eritrea ayaa si weyn u xumaaday, iyadoo Addis Ababa ay dhawaan jartay xiriirka diblomaasiyadeed ee Asmara, halka sidoo kale ay is-weydaarsadeen tallaabooyin diblomaasiyadeed Masar iyo Itoobiya. Xiisadaha ayaa ku soo beegmaya xilli dagaallo ay dib uga soo cusboonaadeen waqooyiga Itoobiya. Soomaaliya ayaa ka qaybgalaysa shirka xilli ay xoojinayso xiriirka siyaasadeed iyo iskaashiga istiraatiijiga ah ee ay la leedahay Masar. Madaxweynaha Xasan Sheekh iyo Madaxweyne Al-Sisi ayaa Sabtidii magaalada New Alamein kulan gaar ah yeeshay, iyadoo dhinaca Masar uu mar kale xaqiijiyay taageerada uu u hayo madax-bannaanida, midnimada iyo wadajirka dhuleed ee Soomaaliya. Labada dhinac ayaa sidoo kale ka wada hadlay xoojinta xiriirka iyo iskaashiga labada dal. Ka qaybgalka Soomaaliya ee shirkan ayaa sidoo kale ku soo beegmaya iyadoo Itoobiya ay weli door ku leedahay amniga Soomaaliya, gaar ahaan dadaallada ka dhanka ah Al-Shabaab, halka Muqdisho ay dhankeeda sii xoojinayso xiriirrada ay la leedahay dalalka gobolka iyo kuwa kale ee caalamiga ah. Shirka New Alamein ayaa dhacaya iyadoo Masar ay martigelinayso kulamo iyo shirar heer sare ah oo Afrikaan ah, waxaana sidoo kale maanta magaalada lagu qabanayaa shirkii 8-aad ee Isku-dubbaridka Midowga Afrika ee bartamaha sanadka. Kulanka afarta-geesoodka ah ayaa la filayaa inuu fursad u noqdo hoggaamiyeyaasha Masar, Soomaaliya, Eritrea iyo Sudan inay ka wada hadlaan xaaladda amni iyo siyaasadeed ee Geeska Afrika iyo arrimaha kale ee gobolka ee ay danaha wadaagaan.
ISHA-GJ.
