MADAXWEYNE XASAN SHEEKH MAXAMUD OO SI DIIRAN LOOGU SOO DHAWEEYEY MASAR.
(SAWIRKA)-MADAXWEYNE DR.XASAN SHEEKH.
(AL-ALAMAIN/EGYPT)-Madaxweynaha Jamhuuriyadda Federaalka Soomaaliya Md.Dr. Xasan Sheekh Maxamuud ayaa maanta oo Axad ah gaaray magaalo Xeebeedka AL-CAALAMAYN ee dalka Masar, halkaasoo uu kala kulmay soo dhaweyn rasmi ah iyo soo dhoweyn heer sare ah oo uu ka helay mas’uuliyiinta Masar ka dib casuumaad uu ka helay dhigiisa dalka Masar Madaxweyne Abdel Fattah EL-Sisi. Booqashadan oo muujineysa sii socoshada xiriirka soo jireenka ah ee labada dal ayaa ku soo beegmaya iyadoo ay sii kordhayaan iskaashiga gobolka ee dhanka amniga iyo horumarinta dhaqaalaha. Madaxweyne Maxamuud ayaa waxaa ku wehliya wafdi heer sare ah oo ka tirsan Madaxda Soomaaliya, waxaana la filayaa in uu la kulmo Madaxweyne Sisi oo ay ka wadahadlaan sidii kor loogu qaadi lahaa xiriirka labada dal, iyadoo diiradda lagu saari doono dhinacyada ugu muhiimsan ee ay ka mid yihiin iskaashiga Amniga, Ganacsiga, Waxbarashada, iyo Xasilloonida Gobolka. "Soo dhaweynta aan maanta helnay waxay ka tarjumeysaa xiriirka qotada dheer ee taariikhiga ah iyo midka walaaltinimo ee ka dhexeeya shacabka Soomaaliyeed iyo Masar," ayuu Maxamuud ku yiri hadal kooban oo uu jeediyay, isagoo uga mahad-celiyay dowladda Masar soo dhaweynta ay u fidisay, wuxuuna caddeeyay inay Soomaaliya ka go'an tahay xoojinta xiriirka. Labada hogaamiye ayaa sidoo kale la filayaa inay ka wadahadlaan arrimaha gobolka, oo ay ku jiraan Horumarka Geeska Afrika, Marinka Badda Cas, dadaallada wadajirka ah ee looga hortagayo Argagixisada iyo Xagjirnimada Gobolka. Booqashadan ayaa muujineysa kororka xiriirka diblomaasiyadeed ee Masar ay ku leedahay Bariga Afrika iyo Geeska Afrika, iyo sidoo kale dadaalka Soomaaliya ay ugu jirto adkeynta iskaashiga caalamiga ah ee ay ku dooneyso dib u habeynta dhaqaalaha iyo xasilinta siyaasadda. Faah faahin dheeri ah oo ku saabsan waxyaabihii ay ka wada hadleen iyo waxyaabihii lagu heshiiyay ayaa la filayaa in laga soo saaro kulamada rasmiga ah ee u dhaxeeya Madaxda Dowladda Soomaaliya. Dhinaca kale,Warbaahinta qaarkeed ayaa qoraaysa in safarka deg dega ah ee uu Madaxweyne Dr.Xasan Sheekh Maxamud ku tegay dalka Masr iney la xiriirto warkii shalay kasoo yeeray Reysal Wasaaraha dalka Itoobiya Abiy Axmed ee ahaa in dalka Itoobiya uu dhammaystiray Biya Xireenka uu muranka ka taagnaa ee GERD.
ISHA-SHABELLE.
