ILAALADDA KACAANKA IRAN OO QABTAY MARKAB SIDAY…
(SAWIRKA)-XEEBAHA IRAN.
(TEHRAN/IRAN)-Ciidamada Ilaalada Kacaanka Islaamiga ah ee Iran (IRGC) ayaa gacanta ku dhigay markab uu ka babanaayo calanka Eswatini isla markaana siday “Shidaal koontarabaan ah”, sida ay sheegtay warbaahinta dowladda Axada maanta ah. Ciidamada Iran ayaa si joogto ah u bartilmaameedsada booyadaha sida sharci darada ah ugu daabulaya shidaalka marin biyoodka Hormuz, oo ah goob muhiim u ah shidaalka caalamka iyo shixnadaha gaaska dabiiciga ah ee dareeraha ah. "Markab sidday 350,000 oo litir oo shidaal kontarabaan ah oo ku hoos shaqaynayay calanka Eswatini ayaa la qabtay waxaana la geeyey Bushehr" oo ku yaalla koonfur-galbeed, telefishinka dowladda ayaa yiri, isagoo soo xiganaya taliyaha IRGC maxalli ah. "Waxaa markabka saaran 13 shaqaale ah, oo dhamaantood ka yimid dal jaar ah iyo Hindiya," ayay raacisay. Horaantii bishaan, Ilaalada Kacaanka -- garabka fikirka ee militariga Jamhuuriyadda Islaamiga ah ayaa xaqiijiyay in ay gacanta ku dhigeen markab saliida qaada oo ka babanaayay Jaziirada Marshal kaas oo marayay gacanka. Shirkadda maamusha markabka ayaa markii dambe sheegtay in Iran ay sii daysay markabka iyo 21-shaqaale ah oo la socday. Markabkan oo magaciisa lagu sheegay Talara ayaa ku sii jeeday marin biyoodka Hormuz, markii uu si lama filaan ah u bedelay dhinaca biyaha Iran. Shixnaddeeda la qabtay waxaa ka mid ahaa "Badeecooyin Kiimiko ah oo Iran laga keenay...si sharci darro ah loogu qaaday dhanka Singapore," Wakaaladda wararka Iran ee Fars ayaa tiri, iyadoo raacisay "qofka ugu weyn ee mas'uulka ka ah wuxuu ahaa shakhsi ama shirkad Iiraani ah." Sannadkii hore, IRGC waxay gacanta ku dhigtay markab Konteenar ah, iyagoo sheegay inuu xidhiidh la leeyahay Israa’iil, ka dib weerar lagu hoobtay oo lagu qaaday qunsuliyadda Iran ee Suuriya oo lagu eedeeyay Israa’iil. Si kastaba ha ahaatee, Fars wuxuu sheegay in qabashada Talara aan loo qaadan sidii tallaabo ka dhan ah ummad kale, balse ay ahayd arrin maxalli ah oo keliya.
XIGASHO-AA.
