BAARLAMAANKA CARABTA OO CAMBAAREEYEY FARAGELINTA ISRAEL EE SOOMAALIYA.

(SAWIRKA)-BARLAMANKA CARABTA.

(CAIRO/EGYPT)-Hoggaamiyeyaasha baarlamaanka Carabta ayaa Sabtidii cambaareeyay weerarrada Israa'iil ay ka geysato Lubnaan iyo Suuriya, waxayna diideen faragelinta Israa'iil ee arrimaha Soomaaliya. Shirkan oo ay soo qabanqaabiyeen Baarlamaanka Carabta iyo Midowga Baarlamaanada Carabta, ayaa lagu nuuxnuuxsaday midnimada mowqifka baarlamaanka Carabta ee ku aaddan caqabadaha haysta dunida Carabta. Hoggaamiyayaashu waxay xaqiijiyeen taageeradooda dadaallada lagu ilaalinayo madaxbannaanida, amniga, iyo midnimada dhuleed ee dalalka Carabta. Qaraar gaar ah ayaa la qaatay si looga hortago siyaasadaha Israa'iil ee bartilmaameedsanaya qadiyadda Falastiin, iyadoo dib loo xaqiijinayo taageerada buuxda ee xuquuqda sharciga ah ee dadka Falastiiniyiinta, isla markaana la sheegayo in Falastiin ay weli tahay "qasdiga dhexe ee qaranka Carabta." Qaraar kale ayaa si cad u cambaareeyay faragelinta Israa'iil ee Soomaaliya, Lubnaan, iyo Suuriya, isagoo xoogga saaraya taageerada madaxbannaanida, xasilloonida, iyo midnimada dhuleed ee dalalkaas. Soomaaliya waxay tan u aragtay fursad ay ku muujinayso sida ay uga go'an tahay madaxbannaanida siyaasadeed iyo nidaamka gobolka. Soomaaliya ayaa ka qaybgashay shirka, iyadoo wafdi ka socda Aqalka Sare ay ka soo qayb galeen madaxda hay'adaha sharci-dejinta ee Carabta. Baarlamaanka Carabta waxaa ku jira wakiillo ka socda hay'adaha sharci-dejinta ee dalalka xubnaha ka ah Jaamacadda Carabta. Go'aannada laga soo saaray shirka waxaa loo gudbin doonaa madaxda dalalka Carabta si looga fiirsado Shir-madaxeedka Jaamacadda Carabta ee soo socda.

ISHA-DN.