(MUUQAALKA)-DHISMAHA SAFAARADDA MASAR.
(TRIPOLI/LIBYA)-Masar ayaa dib u furtay safaaraddeedii caasimadda Liibiya ee Tripoli Sabtidii ka dib 12 sano oo ay ka maqnayd, taasoo muujinaysa isku soo dhawaansho ay la gashay maamulka fadhigiisu yahay reer galbeedka ee dalka, sida ay ku sheegtay bayaan ay soo saartay wasaaradda arrimaha dibadda ee Qaahira. Tallaabadan ayaa calaamad u ah isbeddel ku yimid Qaahira, oo ahayd mid ka mid ah taageerayaasha ugu caansan ee taliyaha militariga ee fadhigiisu yahay bariga Khalifa Haftar, oo ah „mid la tartamaysa dowladda fadhigeedu yahay Tripoli. Masar waxay xirtay safaaraddeedii Tripoli sanadkii 2014, markii xafiisyo badan oo shisheeye ah ay xirmeen iyadoo ay sii kordhayaan iskahorimaadyada sababay in dowlado iska soo horjeeda ay isku urursadaan caasimadda iyo bariga dalka weyn ee Waqooyiga Afrika. Wasiirka arrimaha dibadda ee Masar, Badr Abdelatty, ayaa lagu soo xigtay bayaanka isagoo ka hadlayay xafladda dib u furista safaaradda in muhiimadda taariikhiga ah ee dhismaha safaaradda "ay la jaanqaadayso xiriirka qotoda dheer ee aadanaha iyo dhaqanka ee lagu garto xiriirka Masar iyo Liibiya." Dalka Liibiya oo soo saara saliida ayaa galay fowdo tan iyo markii la riday Muammar Gaddafi kacdoonkii ay NATO taageertay sanadkii 2011. Magaalada Benghazi ee bariga Liibiya waxaa ku yaal Ciidanka Qaranka Liibiya oo uu hoggaaminayo taliyaha militariga Khalifa Haftar iyo Aqalka Wakiillada, iyo dowlad uu hoggaamiyo Osama Hammad. Galbeedka waxaa ku yaal Dowladda Caalamiga ah ee Midnimada Qaranka oo uu hoggaamiyo Ra'iisul Wasaare Abdulhamid Dbeibah iyo Golaha Sare ee Dowladda oo ku sugan Tripoli.
ISHA-AN.
