AMIIRKA QADAR OO SHEEGAY AMNIGA KHALIIJKA YAHAY MID AAN….

(MUUQAALKA)-AMIIRKA QADAR.

(DOHA/QATAR)-Amiirka Qatar Sheikh Tamim AL Thani ayaa Talaadada maanta ah ku nuuxnuuxsaday in amniga dalalka Khaliijka iyo ilaalinta madaxbannaanidooda aan la waxyeeleyn karin. "Amniga dowladaha Golaha Iskaashiga Khaliijka iyo ilaalinta madax-bannaanidooda waa arrin aan la waxyeeleyn karin," ayuu ka yiri caasimadda Qatar ee Doha. Amiirku wuxuu sidoo kale ka digay burburka dhaqaale ee ka dhashay dagaalkii Iiraan ku lug lahaa kaas oo dhaliyay xiisadda tamarta adduunka oo dhan. Sheekh Tamim wuxuu sheegay in Qatar ay awood u yeelatay inay nuugto cawaaqib xumada ka dhalatay xasillooni darrada gobolka sababo la xiriira siyaasado la hirgeliyay ka hor dagaalka. Wuxuu sheegay in khilaafku uu carqaladeeyay dhoofinta dalka isla markaana uu gacan ka geystay hoos u dhac ku yimid dakhliga dowladda, kaasoo hoos u dhacay 42% qeybtii hore ee sanadka. Amiirku wuxuu tilmaamayay xiritaanka marin biyoodka Hormuz iyo burburka soo gaaray xarunta tamarta ee Ras Laffan oo ah carqalad weyn oo ku timid dhoofinta Qatar. In kasta oo uu ku daray in dhimista kharashaadka aysan saameyn ku yeelan adeegyada muhiimka ah ama mudnaanta horumarinta. Qatar waxay ka dhigan tahay qiyaastii shan meelood meel ganacsiga gaaska dabiiciga ah ee dareeraha ah (LNG) ee adduunka, taasoo carqaladeyn ku sameysay wax soo saarkeeda iyo marinnadeeda maraakiibta muhiim u ah suuqyada tamarta caalamiga ah. Hadalladan ayaa imanaya iyadoo uu socdo dagaalka Mareykanka iyo Israa'iil ay kula jiraan Iiraan, kaas oo hakad geliyay maraakiibta mara marin biyoodka Hormuz isla markaana dhaawacay kaabayaasha tamarta ee muhiimka ah ee gobolka oo dhan.

ISHA-AN.