WAA KUWEE WADAMADA MADAXDOODA UU MARAYKANKU SOO QABTAY.
(SAWIRKA)-SADAAM XUSEEN IYO MADURO.
(USA)-Mareykanka ayaa Sabtidii shalay ku dhawaaqay xarigga Madaxweynaha Venezuela Nicolas Maduro iyo Xaaskiisa Cilia Flores howlgal milatari oo ballaaran oo laga fuliyay gudaha dalka Venezuela, ka dibna laga soo wareejiyay dalka dibaddiisa, sida lagu sheegay war uu soo saaray Madaxweynaha Mareykanka Donald Trump oo loo mariyay barnaamijka "Runta Bulshada". Horumarkan wuxuu ka dhigan yahay kor u kac aan horay loo arag oo ku yimid xiriirka Mareykanka iyo Venezuela, gaar ahaan tan iyo markii Washington ay ku dhawaaqday sanadihii hore abaalmarinno dhaqaale oo ballaaran oo loogu talagalay macluumaadka horseeday xarigga Maduro, ka hor inta aysan abaalmarinta kor u qaadin 2025 ilaa $50 milyan, iyadoo lagu eedeeyay inuu ku lug lahaa "shabakadaha ka ganacsiga daroogada iyo iskaashiga ururada dambiyada caalamiga ah." Caracas ayaa si isdaba joog ah u beenisay eedeymahan, iyadoo ku tilmaantay inay qayb ka yihiin "dagaal siyaasadeed iyo mid dhaqaale" oo lagu bartilmaameedsanayo nidaamka talada haya. Xariga Maduro ma aha mid aan hore loogu arag siyaasadda Mareykanka; Mareykanka ayaa hore, si toos ah ama si dadban, u xiray ama u afgembiyay tiro madax dowladeed ah, gaar ahaan:
* Manuel Noriega, Madaxweynaha Panama: Ciidamada Mareykanka ayaa xiray sanadkii 1989 intii lagu jiray duullaankii Panama waxaana loo qaaday dhulka Mareykanka halkaas oo lagu Maxkamadeeyay dacwado la xiriira ka Ganacsiga Daroogada iyo Dhaqidda lacagta.
* Slobodan Milosevic, Madaxweynihii hore ee Serbia/Yugoslavia: Waxaa la xiray 2001 iyadoo cadaadis siyaasadeed iyo mid dhaqaale oo toos ah lagu saaray Mareykanka, waxaana loo gudbiyay Maxkamadda Caalamiga ah ee Dembiyada ee Hague.
*Saddam Xuseen, Madaxweynaha Ciraaq: Ciidamada Mareykanka ayaa qabtay sanadkii 2003 ka dib markii Mareykanku uu weeraray Ciraaq, ka hor inta aan loo gacan gelin mas'uuliyiinta Ciraaq oo Maxkamadeeyay oo dilay sanadkii 2006.
* Charles Taylor, Madaxweynaha Liberiya: Waxaa la xiray 2006 iyadoo taageero toos ah laga helay Mareykanka, waxaana loo gudbiyay Maxkamadda Gaarka ah ee Sierra Leone, ka dibna waxaa loo wareejiyay Hague halkaas oo lagu xukumay sannado badan oo xabsi ah.
*Juan Orlando Hernandez, Madaxweynaha Honduras: Mas'uuliyiinta waddankiisa ayaa xiray 2022 waxayna u dhiibeen Mareykanka. Washington waxay ku eedeysay inuu maleegayay inuu kookayn ku soo geliyo Mareykanka iyo inuu la macaamilo ururada dambiyada. Xarigga Maduro wuxuu dhaliyay falcelin caalami ah oo isku dhafan, laga bilaabo cambaareyn loo jeediyay oo u aragta howlgalka mid xadgudub cad ku ah madaxbannaanida Venezuela, ilaa baaqyo degdeg ah oo Golaha Ammaanka ee Qaramada Midoobay uu u jeediyo si loo baaro sharci ahaanshaha faragelinta Maraykanka.
XIGASHO-AA.
