SOOMAALIYA OO SHIRKADDA META KALA HADASHAY ARRINTA WHATSUP.
(SAWIRKA)-WASIIRUL DAWLAHA ISGAARSIINTA DFS.
(MUQDISHO/SOMALIA)-Dowladda Soomaaliya ayaa sheegtay inay wada-hadallo la furtay shirkadda Meta, ka dib markii ay walaac ka muujisay qorshaha WhatsApp ee u oggolaanaya isticmaalayaasha inay ku wada xiriiraan magacyo halkii ay ka isticmaali lahaayeen lambarro telefoon. Wasiiru Dowlaha Wasaaradda Isgaarsiinta iyo Tiknoolajiyadda Soomaaliya, Axmed Cismaan Diiriye, ayaa sheegay in dowladda ay rajaynayso in heshiis laga gaaro arrintan ka hor inta aan muuqaalka cusub si rasmi ah loogu soo bandhigin isticmaalayaasha WhatsApp. Wuxuu xusay in Soomaaliya ay leedahay duruufo amni iyo dhaqaale oo gaar ah, isla markaana dhaqaalaha dalka uu si weyn ugu tiirsan yahay adeegyada lacagaha moobilka lagu kala diro. Wasiirku wuxuu sheegay in dowladda ay ka cabsi qabto in adeegsiga magacyo isticmaale oo aan si toos ah loola xiriirin karin lambarro telefoon uu adkeyn karo dabagalka dambiyada internet-ka, isla markaana uu kordhin karo halista khiyaanooyinka maaliyadeed iyo dadka isu ekaysiinaya dadka kale. Meta ayaa dhankeeda sheegtay in muuqaalka cusub uusan weli si rasmi ah u shaqayn, isla markaana isticmaalayaashu ay weli u baahan doonaan lambar telefoon si ay akoon uga sameystaan WhatsApp. Shirkaddu waxay intaas ku dartay in muuqaalka cusub lagu daray tallaabooyin amni oo looga hortagayo khiyaanooyinka iyo isticmaalka khaldan. Soomaaliya ayaa sheegtay inay doonayso dammaanad cad oo muujinaysa in nidaamka cusub uusan wiiqi doonin awoodda hay'adaha ammaanka ee dabagalka dambiyada, isla markaana Meta ay caddeyso sida loo ilaalin doono amniga iyo hufnaanta adeegga ka hor inta aan isbeddelka la hirgelin.
ISHA-HOL.
