QARAX ISMIIDAAMIN AH OO KA DHACAY BAKISTAAN.
(SAWIRKA)-BURBUR KA DHASHAY QARAX.
(KARACHI/PAKISTAN)-Wararka laga helaayo caasimadda dalka Bakistaan ee Karaaji ayaa sheegayo in Tirada dhimashada ee ka dhalatay Qarax looga shakisan yahay inuu ahaa ismiidaamin kaasoo lala beegsaday tareen mara koonfur-galbeed Pakistan Axadda maanta ah ayaa kor u kacday waxa eyna gaartay ilaa 28 iyadoo shan kale oo dhaawac ah ay ku dhinteen dhaawacyo ka soo gaaray isbitaallada maxalliga ah, sida ay booliisku iyo ilo caafimaad u sheegeen Wakaaladda wararka ee Anadolu. Tirada dadka dhaawacmay ayaa sidoo kale kor u kacday waxa eyna gaartay ilaa 90, qaar ka mid ahna ay xaaladdoodu aad u liidato. Sida laga soo xigtay ilo-wareedyadu, qofka is qarxiyay, oo la rumeysan yahay inuu kaligiis falka geystay, ayaa gaari walxaha qarxa laga soo buuxiyay ku dhuftay tareenka oo sidoo kale ay saarnaayeen shaqaale militari oo ku sugan Quetta, oo ah caasimadda gobolka Balochistan. Qaraxa ayaa ka dhacay wadada tareenka xilli tareenku uu ku sii jeeday aagga magaalada ee la isku haysto. Mas'uuliyiintu waxay sheegeen in qaraxu uu ahaa mid awood badan oo laga maqlay meel dhowr mayl u jirta. Dadka ay dhibaatadu soo gaartay waxaa ku jiray dad rayid ah, iyadoo guryo badan ay ku yaalliin meel u dhow khadka tareenka iyo dhowr baabuur oo burbur xooggan soo gaaray. Ciidanka Xoreynta Balochistan ee la mamnuucay (BLA) ayaa mas'uuliyadda ku sheegtay bayaan ay u dirtay warbaahinta maxalliga ah, iyagoo sheegay in qof ismiidaamiyay uu bartilmaameedsaday shaqaalaha militariga. Rasaas xooggan ayaa sidoo kale la soo sheegay ka dib qaraxa, halka mas'uuliyiintu ay ku dhawaaqeen xaalad degdeg ah isbitaallo dhowr ah oo ku yaal Quetta. Horay, Babar Yousafzai, oo ah kaaliyaha gaarka ah ee Waaxda arrimaha gudaha ee gobolka, ayaa sheegay in ciidamada amniga iyo kooxaha samatabbixinta ay gaareen goobta iyadoo booliisku ay ka shaqeynayaan sidii loo ogaan lahaa nooca qaraxa. Balochistan, oo ah gobol hodan ku ah macdanta iyo waddo weyn oo loo maro Wadada Dhaqaalaha ee Shiinaha iyo Pakistan oo balaayiin doolar ku kacaysa, ayaa muddo dheer la kulmaysay rabshado xagjir ah oo lala xiriiriyay kooxaha gooni u goosadka. Ra'iisul Wasaare Shehbaz Sharif ayaa cambaareeyay weerarka, isagoo yiri "Falalka argagaxisada ee fulaynimada ah ma wiiqi karaan go'aanka dadka Pakistan." "Waxaan ku adkeysaneynaa go'aankeenna ah inaan ciribtirno argagixisada nooc kasta iyo muuqaalkeeda," ayuu ku qoray bogga warbaahinta bulshada ee Mareykanka ee X.
ISHA-AA.
