(MUUQAALKA)-WASAARADDA CADAALADDA.
(WASHINGTON/USA)-Qandaraasle hore oo ka tirsanaan jiray tignoolajiyada macluumaadka ee dowladda Mareykanka ayaa qirtay inuu maleegay shirqool uu ku doonayay inuu macluumaad sir ah ugu gudbiyo dowladda Itoobiya, sida ay sheegeen dacwad oogayaasha federaalka. Abraham Teklu Lemma, oo 54 jir ah, kana soo jeeda Silver Spring, Maryland, ayaa haystay ogolaansho amni oo sir ah wuxuuna u shaqeeyay qandaraasle ka tirsan Waaxda Arrimaha Dibadda, Waaxda Caddaaladda iyo Xafiiska Sahaminta Qaranka, sida ku cad dukumentiyada maxkamadda. Dacwad oogayaasha ayaa sheegay in Lemma uu la shirqoolay saraakiil sare oo ka tirsan dowladda Itoobiya laga soo bilaabo 2021 ilaa xariggiisii bishii Agoosto 2023. Wuxuu ururiyay oo la wadaagay daraasiin dukumeentiyo sir ah, qoraallo, agab iyo sawirro, oo ay ku jiraan macluumaad lagu sifeeyay heerarka macluumaadka ee ugu sarreeya iyo kuwa xasaasiga ah. Dacwad oogayaashu waxay sheegeen in macluumaadka badankood uu khuseeyay iskahorimaad hubaysan oo ka dhacay Itoobiya. Dukumentiyada maxkamaddu waxay sheegayaan in Lemma uu nuqul ka sameeyay macluumaad sir ah oo laga soo qaatay nidaamyada dowladda ee amniga ah isla markaana uu ka saaray xarumo ammaan ah. Sidoo kale wuxuu gacanta ku qoray macluumaad sir ah oo qoraallo ah wuxuuna ka soo qaaday xarumaha dowladda. Diseembar 18, 2021, Lemma wuxuu ku dhiirrigeliyay shirqool inuu ka hortago kooxaha militariga ee la dagaallamaya dowladda Itoobiya, sida ay sheegeen dacwad oogayaasha. Wuxuu qoray, "Waa inaan dadkan hal mar dhammeynaa, haddii kale weligeed nabad ma jiri doonto Itoobiya." Maalintii dambe, wuxuu la wadaagay macluumaad dheeraad ah wuxuuna qoray, "Fadlan dir Dro[nes]." Lemma wuxuu qirtay inuu galay dambi ah shirqool lagu doonayay in macluumaadka difaaca qaranka loogu gudbiyo dowlad shisheeye. Sida ku cad heshiiskiisa qirashada, wuxuu ogolaaday xukun xabsi ah oo u dhexeeya 120 iyo 262 bilood, haddii maxkamaddu aqbasho heshiiska. Xukunka Lemma waxaa loo qorsheeyay Abriil 14, 2027.
XIGASHO-ABC.
