(MUUQAALKA)-DHAGARQABE ALSHABAAB AH.
(MUQSDISHO/SOMALIA)-Ciidamada Hay’adda Sirdoonka iyo Nabadsugidda Qaranka (NISA) iyo Booliiska Soomaaliyeed ayaa howlgal wadajir ah oo ay ka fuliyeen xaafadda KPP ee degmada Hodan, magaalada Muqdisho, ku qabtay nin lagu magacaabo Xasan Nuur Muuse, oo loo yaqaanno Makane iyo Cali Sabti, kaas oo ay hay’adaha amnigu ku eedeeyeen inuu qorsheynayay falal amni-darro. Sida lagu sheegay war-saxaafadeed ay NISA soo saartay, ciidamada amniga ayaa ka shakiyay dhaqdhaqaaqa ninkan, kaddib markii ay ka dareemeen xaafadda. Hay’addu waxay sheegtay in ninku isku dayay inuu baxsado, isla markaana uu iska tuuray bam-gacmeed uu watay, balse ciidamada ayaa ugu dambayn gacanta ku dhigay isaga oo badqaba. NISA ayaa sheegtay in howlgalka ay ka qeyb qaateen ciidamada Ilaalada Shacabka ee hay’adda, kuwaas oo u tababaran ka hortagga falalka amni-darrada iyo la socodka dhaqdhaqaaqyada ay u arkaan kuwo khatar ku ah amniga shacabka. Hay’addu waxay soo qabashada ninkan ku tilmaantay mid muujinaysa feejignaanta ciidamada amniga iyo dadaallada lagu doonayo in looga hortago in kooxaha hubeysan ay ka dhex howlgalaan bulshada. Si kastaba ha ahaatee, faahfaahin dheeraad ah lagama bixin nooca falka la sheegay in ninku qorsheynayay, mana jirto xog dheeraad ah oo ku saabsan tallaabooyinka sharci ee xiga. NISA ayaa sidoo kale sheegtay inay sii wadi doonto howlgallada ka dhanka ah AL-Shabaab iyo Daacish, iyadoo ku boorrisay shacabka inay la wadaagaan hay’adaha amniga xog kasta oo la xiriirta dhaqdhaqaaqyo laga shakiyo.
XIGASHO-GJ.
