MAHAD MAXAMED SALAAD OO XILKA NISA MAR KALE LA WAREEGAY.
(SAWIRKA)-XIL WAREEJIN.
(MUQDISHO)-Madaxweynaha Jamhuriyadda Federaalka Soomaaliya, Mudane Xasan Sheekh Maxamuud, ayaa si rasmi ah xilka uga wareejiyey Taliyaha cusub ee Hay’adda Nabad Sugidda iyo Sirdoonka Qaranka (NISA), Mudane Mahad Maxamed Salaad, iyadoo xilkaasna uu kala wareegay Taliyihii hore ee C/llaahi Maxamed Cali Sanbaloolshe, ka dib munaasabad maanta oo Sabti ah lagu qabtay Xarunta Hay’adda NISA ee magaalada Muqdisho. Munaasabadan xil wareejinta ah oo si heer sare ah loo soo agaasimay ayaa lagu soo bandhigay isbedel muuqda oo lagu sameeyay Hogaanka Hay’adda Sirdoonka iyo Nabadsugida Soomaaliya, xilli dalka uu sii xoogeysanayo dagaalka ka dhanka ah Argagixisada iyo isku dhafka Hey’adaha Amniga Qaranka. Munaasabadda ayaa waxaa ka soo qeyb galay mas’uuliyiin muhiim ah oo ka tirsan dowladda iyo laamaha amniga oo uu ka mid ahaa Wasiirka Amniga Gudaha C/llaahi Sheekh Ismaaciil Fartaag, Guddoomiyaha Gobolka Banaadir ahna Duqa Magaalada Muqdisho, Mudane Xasan Maxamed Xuseen Muungaab, Taliyaha Ciidanka Booliska Soomaaliyeed Gen. Asad C/laahi Cismaan, iyo Saraakiil kale oo ka tirsan Ciidanka Booliska. Madaxweyne Xasan Sheekh ayaa ku ammaanay Agaasimaha Hay’adda NISA C/llaahi Sanbaloolshe oo xilka ka degaya doorkii uu ka qaatay xoojinta howlaha shaqo ee Hay’adda iyo sidii uu uga qeyb qaadan lahaa la dagaalanka Argagixisada intii uu xilka hayay.
“ Mudane Sanbaloolshe waxa uu door muhiim ah ka qaatay horumarinta laamaha amniga Soomaaliya, waxa uuna u istaagay sidii uu uga hortagi lahaa khataraha uga imaanaya kooxaha xagjirka ah” ayuu yiri Madaxweynaha oo hadalkiisa sii wata.
Isku shaandheynta hoggaanka ayaa qeyb ka ah dadaallada ballaaran oo ey waddo dowladda Soomaaliya si sare loogu qaado waxtarka Hay’adaha Amniga iyo in la joogteeyo howlgallada ka dhanka ah Argagixisada. Mudane Mahad Maxamed Salaad oo horay u soo qabtay xilka Agaasimaha NISA ayaa la soo noqday mas’uuliyad cusub iyo rajo cusub. Dib u magacaabistiisa ayaa loo arkaa tallaabo uu ku durayo waayo-aragnimada iyo sii wadida Hoggaanka Hay’adda iyadoo Soomaaliya ey u gudubtay marxalad xasaasi ah oo xasilinteeda iyo dib u dhiskeeda ah. Madaxweyne Xasan Sheekh ayaa ku booriyay Mudane Mahad Salaad in la xoojiyo howlgallada ka dhanka ah Argagixisada, xoojinta isku xirka Hay’adaha, iyo horumarinta kalsoonida shacabka iyo wadashaqeynta Hay’adda Nabadsugidda.
“Amniga shacabka Soomaaliyeed waa muhiimada ugu weyn,” ayuu yiri madaxweyne Xasan Sheekh. "Hoggaanka cusub waa in uu dhisaa aasaaska la dhigay, waa in uu sii qoto dheereeyaa wadashaqeynta hay'adaha kale ee amniga, waana in uu muwaadiniinteena ka ilaaliyo khataraha xagjirnimada."
Hoggaanka cusub ayaa la filayaa inuu bilaabo qorshe dib u habeyn ballaaran oo looga gol leeyahay in lagu casriyeeyo howlaha NISA, balaarinta awoodda Xog Uruurinta, iyo kor u qaadida isku xirka istaraatiijiyadeed oo ey la leeyihiin saaxiibada Amniga Qaranka iyo kuwa caalamiga ah. Mudane Mahad Salaad ayaa sidoo kale looga fadhiyaa in uu mudnaanta koowaad siiyo wada shaqeynta bulshada iyo xog wadaagga si looga hortago weerarada Argagixisada iyo in la carqaladeeyo shabakadaha xagjirka ah ee ka howlgala dalka. Kala-guurka hoggaankan ayaa astaan u ah dadaallada socda ee Soomaaliya ee lagu xaqiijinayo nabadda iyo xasilloonida. Dib-u-soo-celinta shaqsiga sida Mahad Salaad oo kale ah waxay hoosta ka xariiqaysaa go’aanka dowladda ee ku aaddan xoojinta NISA iyo ilaalinta horumarka adag ee dalka uu ku tallaabsaday. Iyadoo Soomaaliya ey sii waddo dib u dhiska hay’adaha dowliga ah iyo la dagaalanka khataraha dhanka amniga ah, doorka NISA waxa uu ahaan doonaa mid udub dhexaad u ah qaabeynta mustaqbalka dalka.
ISHA-DALSAN.
