DAGAAL CULUS OO CAAWA KA QARXAY MAGAALADA ZAWIYA EE DALKA LIIBIYA.
(SAWIRKA)-MAGAALADDA ZAWIYA/LIIBIYA.
(TRIPOLI/LIBYA)-Wararka laga helaayo caasimadda dalka Liibiya ee Tripoli ayaa sheegaayo in Iskahorimaadyo rabshado wata ayaa habeenkii Jimcaha ka qarxay magaalada Zawiya, oo ku taal galbeedka caasimadda Tripoli, taasoo dib u soo celisay burburka amni ee ka socda galbeedka Liibiya, iyadoo ay sii kordhayaan cabsida laga qabo badbaadada dadka rayidka ah. Dad goob joogayaal ah ayaa sheegay in iska horimaadyo hubaysan ay ka dhaceen aagga "Sayida Zeynab", oo ku yaal koonfurta magaalada Zawiya, isla markaana ay ka dhacayaan kooxo xiriir la leh Qalabka Taageerada Xasiloonida, oo ay taageerayaan Golaha Madaxweynaha, iyo xubno ka tirsan "Battalion 459" oo xiriir la leh Wasaaradda Difaaca ee Dowladda Midnimada Qaranka.
BAMBOOYINKA GACANTA LAGA TUURO IYO BAMBOOYINKA GENTAALADDA LAGA TUURO:
Dhanka kale, muuqaallo lagu baahiyay baraha bulshada ayaa lagu maqlayay dhawaqa bambooyinka gacanta lagu tuuro iyo bambooyinka gantaalada lagu tuuro ee labada dhinac is dhaafsadeen, waxaana cirka magaalada laga arkay gantaalada. Iyadoo dagaalka uu socdo,laanta Bisha Cas ee Liibiya qeybteeda Zawiya ayaa ku boorrisay dadka deegaanka inay taxaddar muujiyaan oo ay ka fogaadaan daaqadaha si ay u badbaadaan dagaallada socda awgood, iyadoo ku nuuxnuuxsatay baahida loo qabo feejignaan xad dhaaf ah ilaa xaaladdu ay caadi ku soo noqoto. Waxay sidoo kale ka codsatay dhinacyada dagaallamaya inay joojiyaan colaadaha oo ay furaan marin ammaan ah oo loogu talagalay qoysaska ku xayiran.
BOOQASHADA MANFI:
Isku dhacyadan ayaa yimid maalin ka dib markii Guddoomiyaha Golaha Madaxweynaha Maxamed AL-Manfi uu booqday magaalada Zawiya, isagoo ku nuuxnuuxsaday in "Liibiya ay wajahayso isgoysyo: inay dhisto dowlad mideysan oo leh go'aan qaran ama inay sii waddo sidii goob furan oo loogu talagalay fowdo iyo faragelin shisheeye." Waxay sidoo kale ku soo beegantay iyadoo xiisadda sii kordheysa iyo burburka amniga ee galbeedka Liibiya, oo ay weheliso maqnaanshaha xal siyaasadeed oo dhammaystiran si loo soo afjaro kala qaybsanaanta iyo fowdada loona mideeyo hay'adaha amniga iyo militariga ee dalka. Zawiya waa mid ka mid ah magaalooyinka Liibiya oo ay ku badan yihiin maleeshiyaad hubeysan, kuwaas oo isku haya oo iskuna dagaalla meelaha ay saameyn ku leeyihiin iyo waddooyinka tahriibinta, taasoo keentay in dagaallo soo noqnoqday ey ka dhacaan.
XIGASHO-AA.
