CARUUR MATAANO SOOMAALIYEED AH OO LAGU KALA FUJIYEY SACUUDIGA.
(SAWIRKA)-ILMO SOOMALI AH ISKUNA DHEGAN.
(RIYADH/KSA)-Mataanaha isku dhegan ee Raxma iyo Ramla ayaa si guul leh looga kala fujiyey Isbitaalka Carruurta ee King Abdullah Specialized Children's Hospital ee Wasaaradda Ilaalada Qaranka ee Riyadh, sida uu sheegay Dr. Cabdullah AL-Rabeeycah fiidnimadii Khamiista. Saddex marxaladood oo qalliin ah ayaa harsan, waxaana la filayaa in qalliinku soo gabagaboobo ilaa saddex saacadood gudahood, sida uu sheegay Dr. Cabdullah Al-Rabeeycah, oo madax ka ah kooxaha Barnaamijka Mataanaha ee Isku Xiran ee Sacuudiga, isla markaana ah kormeeraha guud ee hay'adda gargaarka Sacuudiga ee KSrelief. Carruurta ayaa waalidkood la yimid Sacuudi Carabiya iyagoo raacaya tilmaamaha Boqor Salmaan bishii Maajo ee sannadkii hore, waxaana loo wareejiyay isbitaalka si baaritaanno loogu sameeyo si loo ogaado in qalliinku uu ammaan yahay iyo in kale. Sarkaal ka tirsan SCTP ayaa u sheegay Arab News in marka laga soo tago dhibka faragelinta, ay sidoo kale jiraan liis sugitaan oo carruur kale ah. AL-Rabeeycah wuxuu sheegay in gabdhaha 13 bilood jirka ah ee yimid Maajo 6-deedii, eyna isaga dhegnaayeen caloosha hoose iyo miskaha. "Mataan kasta waxay leedahay laba addimo hoose oo dhammaystiran, waxayna wadaagaan lafo miskaha ah, mindhicir iyo malawad, iyadoo ay isku dheggan yihiin habdhiska kaadida iyo taranka," ayuu yiri AL-Rabeeycah. Wuxuu sharraxay in Ramla ay la ildaran tahay burbur dhammaystiran oo labada kelyood ah, isla markaana ay u baahan doonto dhaqista Kilyaha(dialysis) deg deg ah ka dib marka ay kala furmaan. Raxma waxay la il daran tahay burbur dhammaystiran oo ka yimaada kelyaheeda bidix, waxaana jira fiixyo ku jira kelyaheeda midig, kuwaas oo hadda si ku filan u shaqeynaya laakiin u baahan doona kormeer dhow ka dib qalliinka si loo hubiyo inay sii socoto shaqadiisa, ayuu raaciyay. AL-Rabeeycah wuxuu sheegay in khatarta ay tahay 40 boqolkiiba sababo la xiriira caqabadaha caafimaad ee kiiska. Xaaladda waxaa si faahfaahsan loogu sharraxay waalidiinta mataanaha, kuwaas oo aqbalay qorshaha lagu kala saarayo gabdhaha, ayuu raaciyay. Wuxuu sheegay in qalliinka la filayo inuu qaato ilaa 14 saacadood oo siddeed marxaladood ah, isla markaana ay ka qayb qaadan doonaan 37 la-taliyeyaal, khabiiro, kalkaaliyayaal caafimaad iyo shaqaale ku takhasusay suuxinta, qalliinka carruurta, qalliinka lafaha iyo qalliinka balaastikada. Wuxuu sheegay in Raxma iyo Ramla ay noqon doonaan lammaanihii 68-aad ee mataanaha isku xiran ee la kala saaro barnaamijkan, kaasoo bilaabmay 35 sano ka hor. AL-Rabeeycah ayaa u mahadceliyay hoggaanka Sacuudiga taageerada ay u muujiyeen hindisaha sannadihii la soo dhaafay. Wuxuu Alle uga baryay inuu ku guuleysto kala tagga, kaas oo uu sheegay inuu siin doono gabdhaha fursadda ugu fiican ee ay ku noolaan karaan nolol farxad iyo caafimaad leh. Takhtarka sameeyey Qaliinka Caruurtaan ayaa ku dhashay magaaladda Barakeysan ee Makah AL-Mukaramaha sannadkii 1955-tii, waxa uuna wax ku bartay dalka Sacuudiga uu u dhashay, waa la taliye Boqortooyada dhinaca Caafimaadka, waxa uuna sameeyaa Qaliinadda caruurta ku dhalata iyagoo isku dhegan mataanana ah. Caruurtaan hadda la kala fujiyey ee ku dhalatay iyagoo isku dhegan waa kuwa laga keenay Soomaaliya soona maray Hayadda Samafalka ee Malik Salmaan Bin C/caasiis ee ka hawlgasha caalamka oo dhan. Qaliinkaan ayaa ah midkii 68-aad ee Dr.C/lah qeyb ka yahay. MAASHAA ALAAH.
ISHA-AN.
